Tolosaldeko Hitza

Uztailan ireki eta abuztuaren hasieran, herriko jaiekin batera, itxi zituen ateak Altzoko erraldoiari buruzko erakusketak. Erraldoiaren berezko elementuak eta objetuak egon dira bertan erakusgai; 1.500 ikusle inguru gerturatu dira erakusketa ikustera (gehienak inguruko herrietatik): "Altzo bezalako herri txiki bat izanik, oso pozik egoteko kopurua" dela zehaztu dute udaletxetik.

Ordutegi zabala izan zuen Altzoko erraldoiaren inguruan udal liburutegian antolatutako erakusketak; uztailean zehar egon zen zabalik eta bertan erraldoiaren berezko elementuekin batera, testuak, irudiak... ere aurki zitezkeen. Bisitari kopuruarekin "oso gustura" agertu da Udala, eta gerturatu direnen "jarrera atsegina eta interes berezia" azpimarratu nahi izan du. Erraldoiaren elementuak San Telmo museoan aurkitzen dira baina ez jendeaurrean; gauzak horrela, "jendeak gustura" ikusi dituela azaldu dute udaletxetik. Oro har, "esperientzia polita eta errepikatzeko modukoa" dela zehaztu dute, bestalde.